«Real» himoyachisi Antonio Ryudigerning amaldagi shartnomasi shu iyun oyi yakuniga qadar mo‘ljallangan. AS nashri tarqatgan ma’lumotlarga ko‘ra, germaniyalik futbolchi Madrid klubining mehnat bitimini yana bir mavsumga — 2027 yilning o‘rtalarigacha uzaytirish borasidagi taklifini qabul qilgan.

Qayd etilishicha, Ryudiger ikki yillik shartnoma olishdan umid qilgan edi, biroq u «Real»ning yoshi katta o‘yinchilarga faqat bir yillik bitim taklif qilish haqidagi ichki qoidasiga rozi bo‘lgan. Ma’lumot uchun, Ryudiger shu yilning mart oyida 33 yoshni qarshi oldi.

Antonio Ryudiger «Real» safida jami 182 ta o‘yinda maydonga tushib, o‘z hisobiga 8 ta gol va 4 ta golli uzatma yozdirib qo‘ygan. Ayni damda «qaymoqranglilar» La Liga turnir jadvalida ikkinchi o‘rinni egallab turishibdi va mavsumni aynan shu o‘rinda yakunlashlari naqd bo‘lgan.