«Реал» ҳимоячиси Антонио Рюдигернинг амалдаги шартномаси шу июнь ойи якунига қадар мўлжалланган. AS нашри тарқатган маълумотларга кўра, германиялик футболчи Мадрид клубининг меҳнат битимини яна бир мавсумга — 2027 йилнинг ўрталаригача узайтириш борасидаги таклифини қабул қилган.

Қайд этилишича, Рюдигер икки йиллик шартнома олишдан умид қилган эди, бироқ у «Реал»нинг ёши катта ўйинчиларга фақат бир йиллик битим таклиф қилиш ҳақидаги ички қоидасига рози бўлган. Маълумот учун, Рюдигер шу йилнинг март ойида 33 ёшни қарши олди.

Антонио Рюдигер «Реал» сафида жами 182 та ўйинда майдонга тушиб, ўз ҳисобига 8 та гол ва 4 та голли узатма ёздириб қўйган. Айни дамда «қаймоқранглилар» Ла Лига турнир жадвалида иккинчи ўринни эгаллаб туришибди ва мавсумни айнан шу ўринда якунлашлари нақд бўлган.