«Manchester Yunayted» sobiq futbolchisi Gari Nevill mankunianliklar yarim himoyachisi Brunu Fernandeshni APLda mavsumning eng yaxshi futbolchisi deb atadi.
Jamoa sardori chempionatning 34 ta uchrashuvida 20 ta golli uzatmani amalga oshirdi va Kevin De Bryuyne hamda Tyerri Anrining natijasini takrorlagan holda APL rekordini yangiladi.
«Men Deklan Rays, Gabriel yoki Bernardu Silvaning nomini aytishim mumkin edi, ammo Brununing Kevin De Bryuyne va Tyerri Anri bilan tenglashgani uni kreativlik borasida APLning eng zo‘rlari qatoriga qo‘yadi.
Bir necha haftadan so‘ng men ahmoqdek ko‘rinishim mumkin, chunki Rays va Gabriel yakunda APL va Chempionlar Ligasida g‘olib chiqishlari mumkin, ammo Brunu mavsumning yarmida qiyinchiliklarga duch kelgan, keyin esa shunday o‘yin ko‘rsatgan jamoada to‘p surib, qattiq kurashgani uchun bu e’tirofga loyiqdir.
Rojdestvo bayrami oldidan vaziyat juda keskinlashgan va «Manchester Yunayted»da go‘yoki oxirat yaqinlashgandek tuyulgandi. Jamoa umidsiz ahvolda edi.
Biroq ular «Arsenal» va «Manchester Siti»ga qarshi o‘yinlarda vaziyatni tubdan o‘zgartira olishdi. Shuningdek, «Liverpul» va «Chelsi»ni ham mag‘lub etishdi», – dedi Gari Nevill.
