Portugaliya terma jamoasi bosh murabbiyi Roberto Martines Diogu Jotaning fojiali halokati jamoa uchun juda og‘ir dam bo‘lganini so‘zlab berdi.
«Liverpul» klubi futbolchisi va uning «Penafiel» safida to‘p surgan ukasi Andre Teysheyra da Silva 2025 yilning 3 iyul kuni Ispaniya shimoli-g‘arbida yuz bergan avtohalokat oqibatida vafot etishgan edi. Ular yuqori tezlikda boshqa bir avtomobildan o‘zib ketayotgan vaqtda Lamborghini mashinasining shinasi portlab ketgan. Natijada boshqaruvni yo‘qotgan avtomobil yo‘l chetidagi to‘siqqa urilib, yonib ketgan.
«U bizning kuch-quvvatimiz, quvonchimiz edi. Har birimizning hayotimizda juda og‘ir damlar bo‘ladi. Diogudan ayrilish biz uchun unutilmas va juda og‘ir lahza bo‘ldi. Endi barchamiz Dioguning orzusi uchun kurashishga burchlimiz, u hamisha terma jamoamiz uchun haqiqiy o‘rnak edi.
Diogu Jotaning ruhi, kuchi va qoldirgan namunasi biz uchun maydonda doimo «plyus bir» (qo‘shimcha kuch) bo‘lib qolaveradi», — dedi Martines.
