«Manchester Siti» bosh murabbiyi Pep Gvardiola o‘z faoliyatida ilk bor ketma-ket ikki mavsum davomida chempionlikni qo‘lga kirita olmadi.

«Shaharliklar» APL 37-turi doirasida safarda «Bornmut» bilan durang o‘ynashdi (1:1) va bu natija «Arsenal»ning Premyer-ligada g‘olib chiqishini ta’minladi.

O‘tgan mavsumda «Siti» marrani uchinchi o‘rinda yakunlagan, chempionlik esa «Liverpul»ga nasib etgan edi. Angliyadagi 10 yillik faoliyati davomida Gvardiola ilk bor ketma-ket ikki mavsumni bosh sovrinsiz tugatmoqda. U bundan avval 2016/17 yilgi mavsumda uchinchi, 2019/20 yilgi mavsumda esa ikkinchi o‘rinni egallagan, qolgan oltita mavsumda esa shohsupaga ko‘tarilgan edi.

Bu kabi holat Pepning murabbiylik faoliyatida umuman birinchi marta kuzatilmoqda. U «Barselona»dagi to‘rt yillik faoliyati davomida uch marta La Ligada zafar quchgan, «Bavariya»dagi uch yilida esa uch marta Bundesliga chempioniga aylangan edi.