Londonning "Arsenal" klubi muxlislari APLdagi chempionlikni katta shodiyona bilan nishonlashdi.
«To‘pchilar» Angliya chempionatining asosiy sovrinini mavsum yakunlanishiga bir tur qolganidayoq qo‘lga kiritdi. "Manchester Siti" 37-tur doirasida mehmonda "Bornmut" bilan 1:1 hisobida durang o‘ynab, turnir jadvalida birinchi o‘rinni egallash imkoniyatini yo‘qotganidan so‘ng «Arsenal» chempionlikni rasman ta’minladi.
O‘yindan keyin minglab «Arsenal» muxlislari London ko‘chalariga chiqib, tun bo‘yi tarixiy muvaffaqiyatni nishonlashdi. Asosiy bayramlar «Emireyts» stadioni atrofida bo‘lib o‘tdi — muxlislar klub qo‘shiqlarini kuylashdi, feyerverklar yoqishdi va qizil-oq bayroqlarni hilpiratishdi.
«Arsenal» bundan oldin so‘nggi bor 2003/04 yilgi mavsumda chempion bo‘lgan edi. O‘shanda jamoani Arsen Venger boshqargan va londonliklar mavsumni birorta ham mag‘lubiyatsiz yakunlashgan.
Bosh murabbiy Mikel Arteta uchun bu «Arsenal» bilan APLdagi ilk chempionlik bo‘ldi. Shuningdek, ispaniyalik mutaxassis Angliya chempionati tarixida sobiq APL futbolchisi sifatida murabbiy maqomida chempionlikka erishgan ilk insonga aylandi.













