Madridning «Real» klubi bo‘lajak bosh murabbiyi Joze Mourinyo yarim himoyachi Eduardo Kamavinganing o‘rniga nomzod tanlab ulgurdi. Portugaliyalik mutaxassis fransuz futbolchisini o‘z jamoasida ko‘rmayapti, bu haqda so‘nggi kunlarda turli manbalar xabar tarqatgan edi.
Jurnalist Latigo Serrano bergan ma’lumotlarga ko‘ra, «The Special One» ushbu pozisiya uchun asosiy variant sifatida «Vulverxempton» a’zosi Joao Gomesni ko‘rmoqda.
Transfermarkt portali ekspertlari tomonidan 35 million yevroga baholangan braziliyalik futbolchiga Madridning «Atletiko», «Manchester Yunayted», «Chelsi» va «Liverpul» klublari tomonidan ham qiziqish borligi aytilgan edi. Joriy mavsumda 25 yoshli o‘yinchi «bo‘rilar» safida 41 ta uchrashuvda maydonga tushib, 1 ta gol va 3 ta assistni o‘z hisobiga yozdirib qo‘ydi.
