“Manchester Siti” yarim himoyachisi Rodri faoliyatini Madridning “Real” klubida davom ettirish variantini ko‘rib chiqmoqda. Bu haqda Ispaniyaning Marca nashri xabar berdi.

Manbaga ko‘ra, jamoa bosh murabbiyi Xosep Gvardiola yozda “shaharliklar”ni tark etishi mumkinligi haqidagi xabarlar fonida 29 yoshli futbolchining Ispaniyaga qaytish ehtimoli oshgan. Chunki 2024-yilgi “Oltin to‘p” sohibi agar jamoasini o‘zgartiradigan bo‘lsa, Ispaniya La Ligasidan boshqa chempionatga o‘tmasligini bildirgan.

“Real” rahbariyati qulay sharoitlar yuzaga kelgan taqdirda, bu transferni amalga oshirish imkoni bor deb hisoblamoqda. Sababi madridliklar uzoq vaqtdan beri Rodrining yetakchilik xislatlari, taktik tomondan yetukligi va maydon markazidagi muvozanatni ushlab turish qobiliyatini yuqori baholab keladi. Qolaversa, futbolchining o‘zi ham “qirollik klubi” safida o‘ynashga qarshi emas.

Shartnomasi yakunlanishiga yana bir yil qolgan ispaniyalik futbolchini sotib olish Madrid klubi uchun oson kechmasligi aniq. Biroq, transfer jarayonida Rodrining shaxsiy xohishi hal qiluvchi omilga aylanishi kutilmoqda.

Ma’lumot o‘rnida, Rodri joriy mavsum barcha musobaqalar doirasida jami 33 ta uchrashuvda maydonga tushib, 2 ta gol muallifiga aylandi. Transfermarkt ma’lumotiga ko‘ra, yarim himoyachining hozirgi bozor qiymati 65 million yevroni tashkil etadi.