“Манчестер Сити” ярим ҳимоячиси Родри фаолиятини Мадриднинг “Реал” клубида давом эттириш вариантини кўриб чиқмоқда. Бу ҳақда Испаниянинг Marca нашри хабар берди.

Манбага кўра, жамоа бош мураббийи Хосеп Гвардиола ёзда “шаҳарликлар”ни тарк этиши мумкинлиги ҳақидаги хабарлар фонида 29 ёшли футболчининг Испанияга қайтиш эҳтимоли ошган. Чунки 2024-йилги “Олтин тўп” соҳиби агар жамоасини ўзгартирадиган бўлса, Испания Ла Лигасидан бошқа чемпионатга ўтмаслигини билдирган.

“Реал” раҳбарияти қулай шароитлар юзага келган тақдирда, бу трансферни амалга ошириш имкони бор деб ҳисобламоқда. Сабаби мадридликлар узоқ вақтдан бери Родрининг етакчилик хислатлари, тактик томондан етуклиги ва майдон марказидаги мувозанатни ушлаб туриш қобилиятини юқори баҳолаб келади. Қолаверса, футболчининг ўзи ҳам “қироллик клуби” сафида ўйнашга қарши эмас.

Шартномаси якунланишига яна бир йил қолган испаниялик футболчини сотиб олиш Мадрид клуби учун осон кечмаслиги аниқ. Бироқ, трансфер жараёнида Родрининг шахсий хоҳиши ҳал қилувчи омилга айланиши кутилмоқда.

Маълумот ўрнида, Родри жорий мавсум барча мусобақалар доирасида жами 33 та учрашувда майдонга тушиб, 2 та гол муаллифига айланди. Transfermarkt маълумотига кўра, ярим ҳимоячининг ҳозирги бозор қиймати 65 миллион еврони ташкил этади.