Fransiya prezidenti Emmanuel Makron juma kuni «Stad de Frans» stadionida bo‘lib o‘tadigan mamlakat kubogi finaliga tashrif buyuradi. Unda bosh sovrin uchun «Lans» va «Nissa» jamoalari kurash olib borishadi.

Siyosatchi prezident lojasidan joy oladi. Uning futbolchilarni qutlash uchun maydonga tushishi yoki so‘nggi mavsumlarda bo‘lganidek, stadionning tribuna osti yo‘lagida uchrashuvning 22 nafar ishtirokchisi bilan salomlashishi hozircha ochiqligicha qolmoqda.

Shuningdek, «RMC Sport» nashrining xabar berishicha, davlat rahbari yaqin haftalarda 2026 yilgi Jahon chempionati oldidan Fransiya terma jamoasi qarorgohiga ham tashrif buyuradi. Didye Desham shogirdlari 29 may kuni Klerfontendagi bazada yig‘iladilar, 10 iyunda esa Amerika Qo‘shma Shtatlariga yo‘l olishadi. Eslatib o‘tamiz, Jahon chempionati 11 iyundan 19 iyulga qadar AQSH, Kanada va Meksika maydonlarida bo‘lib o‘tadi.