Франция президенти Эммануэль Макрон жума куни «Стад де Франс» стадионида бўлиб ўтадиган мамлакат кубоги финалига ташриф буюради. Унда бош соврин учун «Ланс» ва «Ницца» жамоалари кураш олиб боришади.
Сиёсатчи президент ложасидан жой олади. Унинг футболчиларни қутлаш учун майдонга тушиши ёки сўнгги мавсумларда бўлганидек, стадионнинг трибуна ости йўлагида учрашувнинг 22 нафар иштирокчиси билан саломлашиши ҳозирча очиқлигича қолмоқда.
Шунингдек, «RMC Sport» нашрининг хабар беришича, давлат раҳбари яқин ҳафталарда 2026 йилги Жаҳон чемпионати олдидан Франция терма жамоаси қароргоҳига ҳам ташриф буюради. Дидье Дешам шогирдлари 29 май куни Клерфонтендаги базада йиғиладилар, 10 июнда эса Америка Қўшма Штатларига йўл олишади. Эслатиб ўтамиз, Жаҳон чемпионати 11 июндан 19 июлга қадар АҚШ, Канада ва Мексика майдонларида бўлиб ўтади.
