«An-Nasr» bosh murabbiyi Jorje Jezush qo‘lga kiritilgan chempionlikdan so‘ng Krishtianu Ronaldu haqida o‘z fikrlarini bildirib o‘tdi.

Portugaliyalik forvard «Damak»ka qarshi kechgan bahsda (4:1) dubl qayd etib, jamoasiga g‘alaba va u bilan birga chempionlik unvonini taqdim etdi. 41 yoshli futbolchi uchrashuvning 80-daqiqasida o‘zining ikkinchi golini urganidan so‘ng ko‘z yoshlarini tiya olmadi.

«Ronalduning ko‘z yoshlari? Uning futbolga bo‘lgan ishtiyoqi beqiyos. Men unga shunday degandim: «Men bu yerga faqat sen tufayli keldim. Titulni qo‘lga kiritamiz — va men g‘olib sifatida ketaman». Allaqachon hammasi biz o‘ylagandek bo‘ldi.

Bundan keyin hali o‘zimizga kelib, batafsil gaplashishga imkoniyatimiz bo‘lmadi. U ham xuddi men kabi butunlay charchagan va holdan toygan. Endi men Portugaliyaga yo‘l olaman, u esa terma jamoa ixtiyoriga jo‘nab ketadi», — deya «Al Nassr Zone» Jezushning so‘zlaridan iqtibos keltirmoqda.

Ma’lumot o‘rnida, ushbu zafar Krishtianu Ronaldu uchun Saudiya Arabistoni chempionatidagi ilk chempionlik hisoblanadi.