«Pari Sen-Jermen» hujumchisi Usmon Dembele kelajakda nimalarga erishmoqchi ekanligi haqida gapirdi. Amaldagi «Oltin to‘p» sohibi bo‘lmish futbolchi 30 may kuni parijliklar safida yana bir bor Chempionlar ligasi g‘olibiga aylanishi mumkin. Hal qiluvchi finalda Luis Enrike jamoasi «Arsenal» bilan to‘qnash keladi.
«Men ham eng muhim, ham oddiy o‘yinlarda hozirgi sermahsulligimni saqlab qolishni istayman. Men gollar, golli uzatmalar va sovrinlarga ochman. Shuningdek, ba’zi uchrashuvlarda o‘yinni o‘z qo‘lingga olish va bor mahoratingni ko‘rsatish alohida ahamiyatga ega ekanligini yaxshi tushunaman — bo‘lajak final aynan shunday bahs bo‘ladi», — deya Dembelening so‘zlarini keltirmoqda RMC Sport.
29 yoshli fransuz joriy mavsumda «PSJ» safida barcha turnirlarda 39 ta uchrashuvda maydonga tushib, 19 ta gol va 11 ta assist muallifiga aylandi.
