Madridning «Real» klubi bosh murabbiyi Alvaro Arbeloa «Barselona» prezidenti Joan Laportaning yaqinda aytgan gaplariga munosabat bildirdi. Laportaning ta’kidlashicha, «Real» o‘z muvaffaqiyatsizliklaridan jamoatchilik e’tiborini chalg‘itish uchun doimiy ravishda Kataloniya klubini tanqid qilib keladi.
«Men Laportaning so‘zlariga alohida ahamiyat bermayman. O‘ylaymanki, biz aytgan gaplarimizning barchasida doimo fikrimizni aniq va ravshan bayon etganmiz. Biz hali ham butun Ispaniya futboli obro‘siga ko‘p yillar davomida dog‘ tushirgan Negreyra ishi bo‘yicha yakuniy qarorni kutmoqdamiz», — dedi Arbeloa matbuot anjumanida.
Bugun soat 22:00 da La Liganing so‘nggi tur o‘yinlari boshlanadi: «Real» Bilbaoning «Atletik» klubiga qarshi maydonga tushsa, «Barselona» esa «Valensiya» bilan to‘qnash keladi.
