Yevropa futboli bo‘yicha taniqli ekspert Endi Brassell «Chelsi» klubiga «Real Madrid» hujumchisi Kilian Mbappeni tarkibga qo‘shib olishni tavsiya qildi. Uning fikricha, fransuz hujumchisining Madriddagi faoliyati kutilganidek chiqmayapti.

«Barchasi tobora oydinlashib bormoqda: Mbappe va «Real» — bu ko‘pchilik kutgandek muvaffaqiyatli juftlik emas. «Chelsi»ga haqiqiy markaziy hujumchi yetishmayapti. Kimdir Kilian faqat chap qanotda o‘ynashni yaxshi ko‘rishini aytishi mumkin, ammo tan olish kerak, u qaysi pozisiyada o‘ynamasin, «Chelsi» uchun ajoyib transfer bo‘lardi. U APLda porlagan bo‘lardi», — dedi Brassell TEAMtalk nashriga bergan intervyusida.

Eslatib o‘tamiz, Kilian Mbappe 2024 yilda erkin agent sifatida «PSJ»dan «Real Madrid»ga ko‘chib o‘tgandi. Uning madridliklar bilan tuzgan shartnomasi 2029 yilning 30 iyuniga qadar mo‘ljallangan. Joriy mavsumda 43 ta uchrashuvda maydonga tushgan hujumchi 41 ta gol urishga va 7 ta golli uzatmani amalga oshirishga muvaffaq bo‘ldi.