Cox Energy energetika kompaniyasi rahbari Enrike Rikelme «Real» prezidentligi uchun saylovlarda ishtirok etishini e’lon qildi.
«Bugun «Real» uchun juda muhim kun. 20 yil deganda nihoyat ovoz berish imkoniyatiga ega bo‘lamiz (Florentino Peres bir necha bor boshqa nomzodlar yo‘qligi sababli avtomatik ravishda qayta saylangan edi).
Bu kimgadir «qarshi» chiqish emas, bu «Real» kelajagi uchun tashlangan qadamdir. Biz ham sport, ham ijtimoiy sohada jiddiy va ilhomlantiruvchi loyiha ustida uzoq vaqt ishladik. Sizlarga juda manzur keladigan loyihani taqdim etamiz. Bugun ushbu saylovlardan zavqlanish va eng yaxshi loyiha uchun ovoz berish kunidir.
Sosyoslardan (klub a’zolaridan) qo‘rqmasdan, bizni tinglash uchun jasorat ko‘rsatishlarini so‘rayman. Loyihamiz qisqa, o‘rta va uzoq muddatli istiqbollarga mo‘ljallangan. Saylov komissiyasi bizni rasman nomzod sifatida tasdiqlashi bilan, barcha tashabbuslarimiz haqida so‘zlab berish uchun 24/7 rejimida ishlaymiz», — dedi Rikelme.
