Madridning «Real» klubi Dortmundning «Borussiya» jamoasi himoyachisi Niko Shlotterbekga bo‘lgan qiziqishini saqlab qolmoqda. Jurnalist Andres Martinesning ma’lum qilishicha, «Qirollik klubi» bosh murabbiyi bo‘lishga yaqin turgan Joze Mourinyo nemis futbolchisini o‘z jamoasida ko‘rishni istamoqda.

Kecha, 23 may kuni portugaliyalik mutaxassis Germaniyada bo‘lib, «Bavariya» va «Shtutgart» o‘rtasidagi Germaniya Kubogi finalini stadiondan kuzatdi. Uchrashuvdan so‘ng Mourinyo Shlotterbekning vakillari bilan uchrashib, «Real»ga ehtimoliy transfer masalasini muhokama qilgani xabar qilinmoqda.

Niko Shlotterbek 2022 yilda «Frayburg»dan «Borussiya»ga 20 million yevro evaziga o‘tgan edi. Uning dortmundliklar bilan amaldagi shartnomasi 2031 yilning 30 iyunigacha mo‘ljallangan. Joriy mavsumda himoyachi «asalarilar» safida barcha musobaqalarda 37 ta o‘yin o‘tkazib, 5 ta gol urdi va 2 ta golli uzatmani amalga oshirdi.