Мадриднинг «Реал» клуби Дортмунднинг «Боруссия» жамоаси ҳимоячиси Нико Шлоттербекга бўлган қизиқишини сақлаб қолмоқда. Журналист Андрес Мартинеснинг маълум қилишича, «Қироллик клуби» бош мураббийи бўлишга яқин турган Жозе Моуриньо немис футболчисини ўз жамоасида кўришни истамоқда.

Кеча, 23 май куни португалиялик мутахассис Германияда бўлиб, «Бавария» ва «Штутгарт» ўртасидаги Германия Кубоги финалини стадиондан кузатди. Учрашувдан сўнг Моуриньо Шлоттербекнинг вакиллари билан учрашиб, «Реал»га эҳтимолий трансфер масаласини муҳокама қилгани хабар қилинмоқда.

Нико Шлоттербек 2022 йилда «Фрайбург»дан «Боруссия»га 20 миллион евро эвазига ўтган эди. Унинг дортмундликлар билан амалдаги шартномаси 2031 йилнинг 30 июнигача мўлжалланган. Жорий мавсумда ҳимоячи «асаларилар» сафида барча мусобақаларда 37 та ўйин ўтказиб, 5 та гол урди ва 2 та голли узатмани амалга оширди.