Pep Gvardiola «Manchester Siti» bosh murabbiyi sifatidagi so‘nggi o‘yinidan so‘ng jamoa muxlislariga murojaat qildi.

«Men hozir juda hayajondaman. Meni nega bunchalik yaxshi ko‘rasizlar? Nima uchun menga nisbatan bunday munosabatdasizlar?

Men bunday mehrni hech qachon tasavvur qilmagandim, bu shunchaki aqlbovar qilmas holat. 10 yil davomida murabbiyingiz bo‘lish men uchun ulkan sharaf edi. Hissiyotlar juda kuchli.

Bugun tribunalarda otam o‘tiribdi, u 95 yoshda — vau! Balki u hammasini tushunmayotgandir, lekin ishonamanki, ko‘p yillar o‘tib, bu go‘zal tribuna mening oilam nomi bilan ataladi. Bu hammasidan ham ortiqroq sharaf. Futbolchilar bu haqda bilmaydi, lekin men o‘sha yerda bo‘laman va ularni kuzatib boraman! Ularning zimmasida juda katta mas’uliyat bor — bu darajani saqlab qolish. Umid qilamanki, ular kurashadi, kurashadi va yana kurashadi.

Bu mening uyim. Agar kelasi yillarda meni ko‘chada yoki «Etihad»da ko‘rib qolsangiz, agar «Man Siti» muxlisi bo‘lsangiz — oldimga keling. Bu klubni ifoda etish men uchun ulkan sharaf edi. Har bir qarorimni klubning manfaati yo‘lida qabul qildim. Men sizlarni juda qattiq yaxshi ko‘raman. Bu juda maroqli edi», — dedi ispaniyalik mutaxassis.