«Atletiko» La Liganing so‘nggi turida «Vilyarreal»ga mag‘lub bo‘ldi (1:5).
Madridliklar Diyego Simeone boshqaruvida ikkinchi bor bir o‘yinda 5 ta gol o‘tkazib yuborishdi. Avvalroq bu holat 2024 yil yanvarda Ispaniya Superkubogi yarim finali doirasida «Real»ga qarshi o‘yinda (qo‘shimcha bo‘limlarda 3:5) kuzatilgandi.
Umuman olganda, Simeone qo‘l ostida «Atletiko» jami 800 ta o‘yin o‘tkazdi. Argentinalik murabbiy 2011 yilning dekabridan buyon jamoani boshqarib kelmoqda.
«Matraschilar» oxirgi bor La Ligada 5 ta gol o‘tkazib yuborgan holat 2011 yil sentyabriga to‘g‘ri keladi. O‘shanda Gregorio Mansano boshchiligidagi jamoa «Kamp Nou»da «Barselona»dan 0:5 hisobida mag‘lubiyatga uchragandi.
