Ispaniya terma jamoasi dushanba kuni 2026 yilgi jahon chempionati uchun yakuniy tarkibni e’lon qildi. Ushbu ro‘yxatda «Real» klubining birorta ham vakili yo‘q. Shu tariqa, Ispaniya o‘z tarixida ilk bor mundialda «Real» o‘yinchilarisiz ishtirok etadi.
«Qirollik klubi» himoyachisi Din Xyoysen terma jamoa bosh murabbiyi Luis de la Fuentening ushbu qaroriga munosabat bildirdi. Xyoysen ijtimoiy tarmoqlarda Sofascore talqiniga ko‘ra La Liganing ramziy terma jamoasi suratini joylashtirdi. E’tiborlisi, ushbu ramziy jamoadan Xyoysenning o‘zi ham o‘rin olgan.
Ko‘rinib turibdiki, futbolchi o‘zini Ispaniya terma jamoasi tarkibiga kiritilishiga loyiq deb hisoblaydi. Eslatib o‘tamiz, Ispaniya terma jamoasi JCH-2026 guruh bosqichida Kabo-Verde, Saudiya Arabistoni va Urugvay terma jamoalariga qarshi bahs olib boradi.
