Fabio Paratichi «Milan» klubining yangi sport direktoriga aylanishi mumkin. Bu haqda MilanPress nashri xabar tarqatdi.
Manbaning bergan ma’lumotlariga ko‘ra, «Milan» rahbariyatining maxsus maslahatchisi Zlatan Ibrahimovich 53 yoshli italiyalik mutaxassis bilan uning ushbu lavozimga tayyorligini bilish maqsadida dastlabki muzokaralarni o‘tkazib ulgurgan.
Paratichi 2026 yilning fevral oyidan buyon «Fiorentina» klubida sport direktori sifatida ishlab kelmoqda. Uning «binafsharanglilar» bilan shartnomasi 2030 yilning 30 iyuniga qadar mo‘ljallangan.
Eslatib o‘tamiz, Paratichi bundan avval «Tottenxem» va «Yuventus» klublarida sport direktori lavozimida faoliyat yuritgan. Aynan uning boshqaruvi davrida «Yuventus» moliyaviy qoidabuzarliklar tufayli jarimaga tortilib, ochkolaridan mahrum qilingan edi. Ushbu mojaro sabab Paratichi 2023 yilning aprelida har qanday futbol faoliyatidan 30 oyga chetlatilgan va faqat 2025 yilning oktyabr oyiga kelibgina katta futbolga qaytgan edi.
«Milan»ning avvalgi sport direktori Igli Tare esa joriy yilning may oyida bosh murabbiy Massimiliano Allegri bilan birgalikda iste’foga chiqarilgan edi.
