Фабио Паратичи «Милан» клубининг янги спорт директорига айланиши мумкин. Бу ҳақда MilanPress нашри хабар тарқатди.
Манбанинг берган маълумотларига кўра, «Милан» раҳбариятининг махсус маслаҳатчиси Златан Ибраҳимович 53 ёшли италиялик мутахассис билан унинг ушбу лавозимга тайёрлигини билиш мақсадида дастлабки музокараларни ўтказиб улгурган.
Паратичи 2026 йилнинг февраль ойидан буён «Фиорентина» клубида спорт директори сифатида ишлаб келмоқда. Унинг «бинафшаранглилар» билан шартномаси 2030 йилнинг 30 июнига қадар мўлжалланган.
Эслатиб ўтамиз, Паратичи бундан аввал «Тоттенхэм» ва «Ювентус» клубларида спорт директори лавозимида фаолият юритган. Айнан унинг бошқаруви даврида «Ювентус» молиявий қоидабузарликлар туфайли жаримага тортилиб, очколаридан маҳрум қилинган эди. Ушбу можаро сабаб Паратичи 2023 йилнинг апрелида ҳар қандай футбол фаолиятидан 30 ойга четлатилган ва фақат 2025 йилнинг октябрь ойига келибгина катта футболга қайтган эди.
«Милан»нинг аввалги спорт директори Игли Таре эса жорий йилнинг май ойида бош мураббий Массимилиано Аллегри билан биргаликда истеъфога чиқарилган эди.
