«Manchester Yunayted» yarim himoyachisi Brunu Fernandesh klub bosh murabbiyi Maykl Kerrikning ish uslubi va metodlariga baho berdi.

«Maykl kelganida jamoaga barqarorlik berishga va futbolchilarda ruhiy xotirjamlikni uyg‘otishga harakat qildi. U klubni ichidan biladi, jamoa qanday o‘ynashi kerakligini va muxlislar nimani ko‘rishni istashini yaxshi tushunadi. Uning murabbiylik uslubi o‘ziga xos vazminligi bilan ajralib turadi. Biz o‘yinlarga to‘g‘ri kayfiyat va katta mas’uliyat hissi bilan yondashamiz.

U muhokama qilinmaydigan asosiy qoidalar va poydevorni yaratib beradi, lekin shu bilan birga bizdan mas’uliyatni o‘z zimmamizga olishni va mustaqil qaror qabul qilishni talab qiladi, chunki o‘yin davomida vaziyat o‘zgarishi mumkin. U to‘p bilan bo‘lganingizda qaror qabul qilish erkinligini beradi. U: «Men sizning o‘rningizga to‘pni qayerga uzatishni yoki qachon zarba berishni hal qilolmayman, lekin bo‘sh zonalar qayerda bo‘lishini tushunishingizga yordam bera olaman», deydi. Menimcha, bo‘sh hududlarni anglash eng muhim narsadir.

Maykl yondashuvining mohiyati mana shunda. U maslahat beradi, qolganini esa o‘zimiz to‘g‘ri hal qilishimiz kerak. U bizga o‘yin jarayonini tahlil qilish imkonini beradi, chunki maydonda har qanday voqea yuz berishi mumkin», — dedi Fernandesh The Diary of a CEO podkastida.