«Arsenal» darvozaboni David Rayyaning aytishicha, 2025/26 yilgi mavsumda Angliya chempionatida qo‘lga kiritilgan g‘alaba jamoani «PSJ»ga qarshi bo‘lib o‘tadigan Chempionlar ligasi finali oldidan yuqori ishonch bilan ta’minladi.

30 yoshli ispaniyalik posbonning so‘zlaridan Diario AS nashri iqtibos keltirmoqda:

«Bu juda zarur edi; men bu yerga kelgan ilk kunimdan boshlab, hatto undan oldin ham asosiy maqsad shu edi. Bu klub eng yuqori sovrinlar uchun raqobatlashish va kurashish uchun mavjud, Premyer-liga esa ulardan biri edi. Biz bunga erishdik va endi bu muvaffaqiyat Chempionlar ligasi finali oldidan bizga ulkan kuch-quvvat bag‘ishlaydi.

Shaxsiy fikrimcha, men hozir juda va juda yaxshi sport formasidaman. Albatta, bu faqat mening xizmatim emas; o‘tkazib yuborilmagan «quruq» o‘yinlarimiz butun jamoaning mehnati mahsulidir. Ketma-ket uch marta «Oltin qo‘lqop»ni qo‘lga kiritib, bu rekordiga erishganimdan juda xursandman — bunaqasi kamdan-kam darvozabonlarga nasib qilgan.

Shu bois, men juda baxtiyorman va jamoa sifatida bajargan ishimizga ishonchim komil. Mavsum davomida raqiblarga deyarli imkoniyat bermagan o‘yinlarimiz ko‘p bo‘ldi va bu bizga chempionatda zafar quchishimizga yordam berdi, eng asosiysi ham aslida shu edi».

Eslatib o‘tamiz, «Arsenal» va «PSJ» jamoalari o‘rtasidagi Chempionlar ligasining final uchrashuvi 30 may kuni bo‘lib o‘tadi.