«Bavariya» bosh murabbiyi va «Manchester Siti»ning sobiq sardori Vensan Kompani, jamoa bosh murabbiyligidan ketgan Xosep Gvardiola, shuningdek, «shaharliklar» futbolchilari Jon Stounz va Bernardu Silvani sharaflash hamda ular bilan xayrlashish marosimida qatnashdi.
Angliya Premyer-ligasining 38-turidan o‘rin olgan «Aston Villa»ga qarshi o‘yindan (1:2) so‘ng tashkil etilgan tadbir doirasida «Etixad» stadioni maydonida vaqtinchalik sahna qurildi. Unga «shaharliklar» tarixidagi ramziy shaxslar birin-ketin ko‘tarilib, Gvardiola davrida qo‘lga kiritilgan sovrinlarni olib chiqishdi. Ushbu aksiya ishtirokchilaridan biri, 2008 yildan 2019 yilgacha klubda to‘p tepgan Kompani qo‘lida APL chempionlik kubogini ko‘tarib chiqdi.
