«Tottenxem» markaziy himoyachisi Kristian Romero «Barselona» nishonida qolishda davom etmoqda. Kataloniya grandi «shporlar» sardorini o‘z safiga qo‘shib olmoqchi, ammo avvalgidek, ushbu futbolchi uchun talab qilinayotgan 60 million yevroni to‘lashga rozi emas.

Diario Sport nashri xabariga ko‘ra, «ko‘k-anorranglilar» transfer narxini tushirish uchun bitimga o‘z futbolchilaridan birini qo‘shishga tayyor. Avvalroq «Barselona» «Tottenxem» Premyer-ligadan tushib ketgan taqdirda Kristian Romeroni qo‘lga kiritishga urinib ko‘rishi haqida xabarlar tarqalgan edi. Biroq London jamoasi 17-o‘rinni egallab, elitadagi o‘rnini saqlab qoldi.

Eslatib o‘tamiz, 28 yoshli markaziy himoyachining amaldagi shartnomasi 2029 yilga qadar mo‘ljallangan.