Madridning «Atletiko» klubi hujumchisi Xulian Alvares «Barselona» a’zosiga aylanishi mumkin. Avvalroq argentinalik futbolchi «matraschilar» bilan shartnomani uzaytirishdan bosh tortgani ma’lum bo‘lgan edi.

Nufuzli insayder Fabrisio Romanoning xabariga ko‘ra, hozirda «Barselona» Alvares transferi bo‘yicha «Atletiko»ga ilk rasmiy taklifini tayyorlamoqda. Ta’kidlanishicha, «ko‘k-anorranglilar» ayrim OAVlarda aytilganidek, kelishuvga boshqa futbolchilarni qo‘shishni rejalashtirmayapti.

Yakunlangan mavsumda 26 yoshli Alvares barcha turnirlarda 49 ta o‘yinda ishtirok etib, 20 ta gol urdi va 9 ta golli uzatmani amalga oshirdi. Eslatib o‘tamiz, avvalroq «Barselona» «Nyukasl» vingeri Entoni Gordonning transferi bo‘yicha kelishuvga erishgan edi. Ushbu transfer summasi taxminan 70-80 million yevroni tashkil etadi.