Мадриднинг «Атлетико» клуби ҳужумчиси Хулиан Альварес «Барселона» аъзосига айланиши мумкин. Аввалроқ аргентиналик футболчи «матрасчилар» билан шартномани узайтиришдан бош тортгани маълум бўлган эди.
Нуфузли инсайдер Фабрицио Романонинг хабарига кўра, ҳозирда «Барселона» Альварес трансфери бўйича «Атлетико»га илк расмий таклифини тайёрламоқда. Таъкидланишича, «кўк-анорранглилар» айрим ОАВларда айтилганидек, келишувга бошқа футболчиларни қўшишни режалаштирмаяпти.
Якунланган мавсумда 26 ёшли Альварес барча турнирларда 49 та ўйинда иштирок этиб, 20 та гол урди ва 9 та голли узатмани амалга оширди. Эслатиб ўтамиз, аввалроқ «Барселона» «Ньюкасл» вингери Энтони Гордоннинг трансфери бўйича келишувга эришган эди. Ушбу трансфер суммаси тахминан 70-80 миллион еврони ташкил этади.
