Londonning «Arsenal» klubi bosh murabbiyi Mikel Arteta APLdagi g‘alaba jamoaga Chempionlar ligasi finalida o‘ziga bo‘lgan ishonchni oshirishga yordam berishini ta’kidladi.

«Arsenal» ketma-ket uch mavsum ikkinchi o‘rinni egallaganidan so‘ng, nihoyat Angliya chempioniga aylandi. Endi «to‘pchilar» 30 may, shanba kuni Budapeshtda bo‘lib o‘tadigan YECHL finalida «PSJ» bilan to‘qnash kelishadi.

«Kimdir u yerda, yuqorida sayyoralarni shu voqea sodir bo‘lishi uchun joylashtirgan shekilli. Boshqa mavsumlarda ham muvaffaqiyatga yaqin edik, lekin nimadir yetishmasdi. Bu safar esa boshidanoq hissiyotlar boshqacha edi, lekin biz avvalgidek barqarorlikni saqlab qoldik.

Maqsadga juda yaqin kelishimizga ishonchim komil edi. G‘alaba qozonish ko‘p omillarga bog‘liq, lekin mening vazifam — futbolchilarni o‘zlarini eng zo‘ri deb hisoblashlariga ishontirish edi, chunki shubhali lahzalar ham bo‘ldi. Men ularga quvvat berib, bu hayotlaridagi eng yaxshi davr ekanini aytdim.

Yelkangizdan tog‘ ag‘darilganida, quvonch va yengillikni his qilasiz. Endi bizda bu sovrin bor va biz bu hissiyotlar, umid va ishtiyoq to‘lqinidan Chempionlar ligasida g‘olib chiqish yo‘lida foydalanishimiz kerak», — deydi Arteta Marca nashriga.

Eslatib o‘tamiz, kuni kecha Arteta Britaniyaning BBC korporasiyasi tomonidan «APLning 2025/2026 yilgi mavsumidagi eng yaxshi murabbiyi» deb topildi.