«Aston Villa» «Selta» himoyachisi Oskar Mingesani sotib olish imkoniyatini ko‘rib chiqmoqda. Bu haqda Sky Sports xabar berdi. 27 yoshli futbolchi yozgi transferlar vaqtida ispan klubini erkin agent sifatida tark etishi mumkin. Ta’kidlanishicha, futbolchining o‘zi ham Angliya Premyer-ligasiga o‘tishdan manfaatdor.

«Aston Villa» bosh murabbiyi Unai Emeri Mingesani uning universalligi tufayli jamoa uchun mos variant deb hisoblaydi. Himoyachi nafaqat qanotda, balki markaziy himoyada ham o‘ynay oladi.

Mingesa «Barselona» tarbiyalanuvchisi hisoblanadi. U kataloniyaliklar asosiy tarkibida 60 dan ortiq o‘yin o‘tkazib, Ispaniya Kubogi sohibiga aylangan. 2022 yilda «Selta»ga o‘tganidan so‘ng, ispaniyalik futbolchi asosiy tarkibdan mustahkam joy oldi va jamoaning yetakchi o‘yinchilaridan biriga aylandi.

«Aston Villa» keyingi mavsumda Chempionlar ligasida ishtirok etishi munosabati bilan tarkibni kuchaytirishni rejalashtirmoqda. Shu bilan birga, birmingemliklar moliyaviy cheklovlarni inobatga olgan holda, imkon qadar tejamkor transferlarga urg‘u berishmoqchi.