«Arsenal» bosh murabbiyi Mikel Arteta Chempionlar ligasi finalida «PSJ»ga qarshi bo‘ladigan o‘yin haqida fikr bildirdi. Mutaxassis jamoalarning kuchli tomonlariga to‘xtalib o‘tar ekan, chempionlikni qo‘lga kiritish uchun ideal o‘yin ko‘rsatish kerakligini ta’kidladi.

«Funksionallik, moslashuvchanlik va intensivlik borasida alohida mahoratga ega ikki jamoa to‘qnash keladi. Bundan tashqari, o‘yinda individual vaziyatlar ham hal qiluvchi ahamiyat kasb etadi, agar Chempionlar ligasini kuzatsangiz, unda ko‘p narsa aynan shularga bog‘liq. Shuning uchun biz bilamizki: g‘alaba qozonish uchun o‘zimizning eng yaxshi versiyamiz bo‘lishimiz kerak», — dedi Arteta UYEFA rasmiy saytiga bergan intervyusida.

Eslatib o‘tamiz, 2024/2025 yilgi mavsumda «PSJ» Chempionlar ligasi g‘olibi bo‘lgan edi. Parijliklar finalda «Inter»ni yirik hisobda (5:0) mag‘lub etgandi. «PSJ» yana finalda o‘ynaydi, biroq bu safar Luis Enrike shogirdlariga raqib sifatida «Arsenal» qarshilik ko‘rsatadi.