«PSJ» himoyachisi Ilya Zabarniy Chempionlar ligasi finalidagi g‘alabadan so‘ng o‘z fikrlari bilan o‘rtoqlashdi. Parijliklar 1:1 hisobidagi durangdan keyin penaltilar seriyasida «Arsenal»dan ustun kelishdi.
«Bu aql bovar qilmaydigan natija, bizda ajoyib klub bor. Hammaga minnatdorchilik bildirmoqchiman. Biz ko‘p mehnat qilyapmiz va bunga loyiq edik. Shunchaki hayratlanarli. Luis Enrike — sehrli inson. Biz u uchun kurashamiz, u esa biz uchun», — dedi Zabarniy TNT Sports telekanaliga bergan intervyusida.
Ma’lumki, «PSJ» ketma-ket ikkinchi yil Chempionlar ligasida g‘olib chiqdi. O‘tgan yilgi finalda Luis Enrike jamoasi «Inter»ni 5:0 hisobida mag‘lub etgan edi. Ilya Zabarniy «PSJ» tarkibiga o‘tgan yilning avgust oyida kelib qo‘shilgan. Bungacha u «Bornmut» va Kiyevning «Dinamo» klublarida to‘p tepgan.
