«Marsel» vingeri Meyson Grinvud faoliyatini Italiyaning «Roma» klubida davom ettirishi mumkin. Insayder Nikolo Skiraning xabar berishicha, 24 yoshli futbolchi rimliklarning kelasi yozgi transferlar oynasidagi asosiy nishoni hisoblanadi.

«Roma» bosh murabbiyi Jan Pyero Gasperini Grinvudni shaxsan o‘z jamoasida ko‘rishni istamoqda va mutaxassis transfer amalga oshishi uchun bor kuchini sarflamoqda. Ma’lumotlarga ko‘ra, «Roma» allaqachon futbolchining agentlari bilan ijobiy muzokaralar o‘tkazgan. Ayni damda klub «Marsel» bilan kelishuv shartlarini muhokama qilmoqda. E’tiborli jihati, agar transfer amalga oshsa, summaning 40 foizi «Manchester Yunayted» klubiga o‘tadi.

Grinvud 2025/26 yilgi mavsumda «Marsel» safida barcha turnirlarda 45 ta o‘yinda maydonga tushib, 26 ta gol va 11 ta golli uzatmaga mualliflik qildi. Transfermarkt ekspertlari futbolchining narxini 55 million yevroga baholamoqda.