Fransiya terma jamoasi va Londonning «Arsenal» klubi sobiq futbolchisi Tyerri Anri «PSJ» bilan o‘yindan keyingi penaltilar seriyasida xatoga yo‘l qo‘ygan «kanonirlar» himoyachisi Gabrielni himoya qildi.
«Nuqtaga yaqinlashib, mas’uliyatni o‘z zimmasiga olgan har qanday futbolchini hurmat qilaman. Nima uchun aynan Gabriel beshinchi bo‘lib zarba berganini bilmayman, lekin u yaxshi mavsumni o‘tkazdi. Finalda Gabriel adashdi, ammo u taslim bo‘lmadi», — deya Anrining so‘zlarini keltiradi CBS Sports.
«PSJ» va «Arsenal» o‘rtasidagi final bahsi 1:1 hisobidagi durang bilan yakunlandi. Gollarga Kay Xavers va Usmon Dembele mualliflik qilishdi. O‘yindan keyingi 11 metrlik zarbalar seriyasida esa Parij grandi futbolchilari aniqroq harakat qilishdi — 4:3.













