Edmontonda O‘zbekiston terma jamoasiga qarshi o‘yin o‘tkazadigan Kanada ustozi Jessi Marsh vakillarimiz haqida o‘z fikrlarini bildirib o‘tdi.

«Biz buni rejalashtirgan edik, chunki bu yaxshi saviyada o‘ynaydigan va bizni sinovdan o‘tkaza oladigan jamoa deb hisoblaymiz», — dedi 52 yoshli murabbiy yakshanba kuni Canadian Soccer Daily muxbirlariga bergan Zoom intervyusida. — «Ular juda yaxshi himoyalanadi, jismonan baquvvat va atletik jamoa. Shu nuqtai nazardan qaraganda, ularning o‘yinida Bosniya va Gersegovina, shuningdek, mintaqadoshligi tufayli Qatar uslubining belgilarini ko‘rish mumkin. Menimcha, Fabio Kannavaro (O‘zbekiston terma jamoasida) yaxshi ish qilmoqda».

Marsh raqibni kamsitishdan ogohlantirdi va O‘zbekiston jahon reytingida 50-o‘rinda bo‘lsa-da, yaqinda tarixda ilk bor Jahon chempionatiga yo‘llanma olganini ta’kidladi.

«Futbol nuqtai nazaridan ular bu sahnada yangi ekanligini va odamlar O‘zbekistondan nimani kutishni bilmasligini tushunaman, lekin biz juda yaxshi va shiddatli raqibni kutmoqdamiz», — dedi Marsh. — «Har ikkala jamoaning hozirgi holatini hisobga olsak, bu yaxshi sinov bo‘ladi. Biz o‘z uslubimizda futbol o‘ynashni, agressiv bo‘lishni, raqibga bosim o‘tkazish va ularga qiyinchilik tug‘dirishni istaymiz. Bu tayyorgarligimiz yo‘lidagi navbatdagi qadam bo‘ladi va Bosniya bilan o‘yin oldidan bizga ishonch bag‘ishlaydi».