Эдмонтонда Ўзбекистон терма жамоасига қарши ўйин ўтказадиган Канада устози Жесси Марш вакилларимиз ҳақида ўз фикрларини билдириб ўтди.
«Биз буни режалаштирган эдик, чунки бу яхши савияда ўйнайдиган ва бизни синовдан ўтказа оладиган жамоа деб ҳисоблаймиз», — деди 52 ёшли мураббий якшанба куни Canadian Soccer Daily мухбирларига берган Zoom интервьюсида. — «Улар жуда яхши ҳимояланади, жисмонан бақувват ва атлетик жамоа. Шу нуқтаи назардан қараганда, уларнинг ўйинида Босния ва Герцеговина, шунингдек, минтақадошлиги туфайли Қатар услубининг белгиларини кўриш мумкин. Менимча, Фабио Каннаваро (Ўзбекистон терма жамоасида) яхши иш қилмоқда».
Марш рақибни камситишдан огоҳлантирди ва Ўзбекистон жаҳон рейтингида 50-ўринда бўлса-да, яқинда тарихда илк бор Жаҳон чемпионатига йўлланма олганини таъкидлади.
«Футбол нуқтаи назаридан улар бу саҳнада янги эканлигини ва одамлар Ўзбекистондан нимани кутишни билмаслигини тушунаман, лекин биз жуда яхши ва шиддатли рақибни кутмоқдамиз», — деди Марш. — «Ҳар иккала жамоанинг ҳозирги ҳолатини ҳисобга олсак, бу яхши синов бўлади. Биз ўз услубимизда футбол ўйнашни, агрессив бўлишни, рақибга босим ўтказиш ва уларга қийинчилик туғдиришни истаймиз. Бу тайёргарлигимиз йўлидаги навбатдаги қадам бўлади ва Босния билан ўйин олдидан бизга ишонч бағишлайди».
