Madridning «Real» klubi hujumkor yarim himoyachisi Sesar Palasios faoliyatini Italiyada davom ettirishi mumkin. Insayder Janluka di Marsio xabar berishicha, 21 yoshli futbolchi uchun kurashda «Komo» va «Udineze» ishtirok etmoqda.
Taxminlarga ko‘ra, bitimga xuddi Nikolas Pas transferida bo‘lgani kabi, arzon narxda qaytarib sotib olish opsiyasi kiritiladi.
Sesar Palasios o‘tgan mavsumda «Qirollik klubi»ning asosiy tarkibida yettita o‘yinda maydonga tushdi. «Real»ning o‘rinbosarlar jamoasi — «Kastilya» safida esa u 36 ta o‘yinda 16 ta gol va 5 ta golli uzatma bilan ajralib turdi. «Transfermarkt» sayti futbolchini 6 million yevroga baholamoqda.
