Argentinalik vinger Niko Gonsales Turinning «Yuventus» klubidan Madridning «Atletiko» jamoasiga doimiy asosda ko‘chib o‘tishi mumkin. Bu haqda taniqli insayder Nikolo Skira xabar bermoqda.

Manbaning bergan ma’lumotlariga ko‘ra, 28 yoshli futbolchining transferi bo‘yicha muzokaralar juda muvaffaqiyatli tarzda oldinga siljimoqda. Futbolchining o‘zi «Atletiko» bilan 2030 yilgacha mo‘ljallangan shartnoma shartlarini kelishib olgan. Unga ko‘ra, vinger madridliklar safida mavsumiga 4 million yevro maosh (plyus bonuslar) oladi.

Eslatib o‘tamiz, «Atletiko» Gonsalesni o‘tgan yozda ijaraga olgan edi. «Matraschilar» tarkibida futbolchi barcha musobaqalarda jami 37 ta uchrashuvda maydonga tushib, 5 ta gol urishga muvaffaq bo‘ldi. Transfermarkt portali ma’lumotlariga ko‘ra, hozirda Niko Gonsalesning bozor qiymati 24 million yevroni tashkil etadi.