Аргентиналик вингер Нико Гонсалес Туриннинг «Ювентус» клубидан Мадриднинг «Атлетико» жамоасига доимий асосда кўчиб ўтиши мумкин. Бу ҳақда таниқли инсайдер Николо Скира хабар бермоқда.

Манбанинг берган маълумотларига кўра, 28 ёшли футболчининг трансфери бўйича музокаралар жуда муваффақиятли тарзда олдинга силжимоқда. Футболчининг ўзи «Атлетико» билан 2030 йилгача мўлжалланган шартнома шартларини келишиб олган. Унга кўра, вингер мадридликлар сафида мавсумига 4 миллион евро маош (плюс бонуслар) олади.

Эслатиб ўтамиз, «Атлетико» Гонсалесни ўтган ёзда ижарага олган эди. «Матрасчилар» таркибида футболчи барча мусобақаларда жами 37 та учрашувда майдонга тушиб, 5 та гол уришга муваффақ бўлди. Transfermarkt портали маълумотларига кўра, ҳозирда Нико Гонсалеснинг бозор қиймати 24 миллион еврони ташкил этади.