«Everton» va Angliya terma jamoasi darvozaboni Jordan Pikford — «Yuventus»ning potensial yangi a’zosiga aylanishi mumkin. Turin klubi yangi posbon qidirmoqda va bundan, tabiiyki, agentlar yaxshi xabardor.

Jurnalist Nikolo Skiraning ma’lumotiga ko‘ra, «keksa sinyora»ga vositachilar orqali ingliz darvozabonining xizmatlari taklif qilingan. A Seriya grandi uchun ushbu variant qanchalik qiziqarli ekani hozircha noma’lum.

O‘tgan yilning kuzida Jordan Pikford «Everton» bilan 2029 yilgacha mo‘ljallangan yangi shartnoma imzolagan edi. Transfermarkt portali 32 yoshli futbolchining bozor qiymatini 13 million yevroga baholamoqda.

Bundan avvalroq «Yuventus» Premyer-liganing boshqa bir taniqli darvozaboni — «Aston Villa» sharafini himoya qilayotgan Emiliano Martinesga qiziqish bildirayotgani haqida xabar berilgan edi.