Madridning «Real» klubi va Fransiya terma jamoasi yulduzi Kilian Mbappe Amerikaning Nike kompaniyasi bilan hamkorlikni to‘xtatish haqida o‘ylamoqda. Bu haqda L'Équipe jurnalistlari xabar bermoqda.

Manbaning ma’lumotlariga ko‘ra, hujumchi yangi sport brendi bilan hamkorlikni boshlamoqchi. Qayd etilishicha, bu brend Puma, Adidas yoki Under Armour bo‘lmaydi. Mbappe shunchaki homiylik shartnomasi bilan cheklanib qolmasdan, brend rivojlanishining faol ishtirokchisiga aylanadi. Kilian kompaniya daromadidan ma’lum bir ulush oladi.

Ispaniya chempionatining yakunlangan mavsumida 27 yoshli forvard 31 ta uchrashuvda maydonga tushdi. Fransiyalik futbolchi o‘z hisobiga 25 ta gol va 5 ta golli uzatmani yozdirib qo‘yishga muvaffaq bo‘ldi.