Madridning «Real» klubi «Chelsi» yarim himoyachisi Enso Fernandesga jiddiy qiziqish bildirmoqda. Bu haqda Daily Mail nashri xabar bermoqda.

Manba bergan ma’lumotlarga ko‘ra, Ispaniya grandi vakillari Argentina terma jamoasi safida Jahon chempioni bo‘lgan 25 yoshli futbolchini sotib olishga qiziqayotganliklarini allaqachon bildirishgan. Futbolchining o‘zi ham klubni o‘zgartirish variantini inkor etmayapti va yangi chaqiriqlarga tayyor.

Qayd etilishicha, «Real»ning Fernandes bilan bog‘liq transfer mish-mishlari anchadan beri mavjud, chunki madridliklar bunday darajadagi futbolchining transferini moliyaviy jihatdan ko‘tara oladigan sanoqli klublardan biri bo‘lib qolmoqda. Florentino Peres klub prezidentligiga qayta saylanganidan so‘ng, transfer bozorida faol ish olib borish niyatida.

«Chelsi» vaziyat rivojini diqqat bilan kuzatib bormoqda va madridliklarning qiziqishi qachon rasmiy taklifga aylanishini kutmoqda. London klubi o‘z vise-sardorini taxminan 140 million yevroga baholamoqda. Shunisi e’tiborliki, «aristokratlar» Fernandes uchun ataylab xaridor qidirishmayapti va agar ularni qoniqtiradigan taklif tushmasa, uni keyingi mavsum uchun ham tarkibda saqlab qolishga tayyor.

Argentinalik futbolchining «Chelsi» bilan shartnomasi 2032 yilning yoziga qadar amal qiladi. Avvalroq Fernandesga «Pari Sen-Jermen» va «Manchester Siti» klublari ham qiziqish bildirayotgani haqida xabarlar tarqalgan edi.