Мадриднинг «Реал» клуби «Челси» ярим ҳимоячиси Энцо Фернандесга жиддий қизиқиш билдирмоқда. Бу ҳақда Daily Mail нашри хабар бермоқда.

Манба берган маълумотларга кўра, Испания гранди вакиллари Аргентина терма жамоаси сафида Жаҳон чемпиони бўлган 25 ёшли футболчини сотиб олишга қизиқаётганликларини аллақачон билдиришган. Футболчининг ўзи ҳам клубни ўзгартириш вариантини инкор этмаяпти ва янги чақириқларга тайёр.

Қайд этилишича, «Реал»нинг Фернандес билан боғлиқ трансфер миш-мишлари анчадан бери мавжуд, чунки мадридликлар бундай даражадаги футболчининг трансферини молиявий жиҳатдан кўтара оладиган саноқли клублардан бири бўлиб қолмоқда. Флорентино Перес клуб президентлигига қайта сайланганидан сўнг, трансфер бозорида фаол иш олиб бориш ниятида.

«Челси» вазият ривожини диққат билан кузатиб бормоқда ва мадридликларнинг қизиқиши қачон расмий таклифга айланишини кутмоқда. Лондон клуби ўз вице-сардорини тахминан 140 миллион еврога баҳоламоқда. Шуниси эътиборлики, «аристократлар» Фернандес учун атайлаб харидор қидиришмаяпти ва агар уларни қониқтирадиган таклиф тушмаса, уни кейинги мавсум учун ҳам таркибда сақлаб қолишга тайёр.

Аргентиналик футболчининг «Челси» билан шартномаси 2032 йилнинг ёзига қадар амал қилади. Аввалроқ Фернандесга «Пари Сен-Жермен» ва «Манчестер Сити» клублари ҳам қизиқиш билдираётгани ҳақида хабарлар тарқалган эди.