O‘zbekistonlik professional bokschi Murodjon Ahmadaliyevning navbatdagi raqibi yarim yengil vazn toifasida WBA yo‘nalishining sobiq chempioni, buyuk britaniyalik Nik Boll bo‘lishi mumkin.

Manbaga ko‘ra, ayni paytda tomonlar o‘rtasida mazkur jang yuzasidan muzokaralar olib borilmoqda. Matchroom Boxing promouterlik kompaniyasi rahbari Eddi Hirn ham bu borada dastlabki muloqotlar boshlanganini tasdiqlagan.

Hozircha ushbu to‘qnashuv rasman tasdiqlanmagan. Shu sababli jangning qachon va qayerda o‘tkazilishi hamda boshqa tafsilotlari ochiqlanmagan.

Ma’lumot o‘rnida, ikkinchi eng yengil vazn toifasida sobiq jahon chempioni hisoblangan Murodjon Ahmadaliyev professional faoliyati davomida 15 ta g‘alaba va 2 ta mag‘lubiyat qayd etgan. 29 yoshli Nik Boll hisobida esa 23 ta g‘alaba, bittadan mag‘lubiyat va durang bor. U o‘zining so‘nggi jangida Brendon Figeroaga imkoniyatni boy berib, WBA kamaridan ayrilgan edi.

Eslatib o‘tamiz, Murodjon Ahmadaliyev so‘nggi bor Toshkentdagi “Humo Arena” majmuasida ringga ko‘tarilgan edi. Ahmadaliyev O‘zbekiston professional boks federasiyasi hamda Lift Promotion kompaniyasi hamkorligida o‘tkazilgan boks oqshomida venesuelalik Egli Moskedani 4-raundda texnik nokautga uchratib, muddatidan avval g‘alaba qozongan.