«Chelsi» klubining sobiq futbolchisi Jo Koul «ko‘klar» «Manchester Yunayted» hujumchisi Markus Reshfordni o‘z safiga qo‘shib olishi kerak deb hisoblaydi.

«Bu yerda hamma gap maosh va kelishuv bahosida. Reshford jamoaning ko‘plab o‘yin uslubiga doir muammolarini hal qila oladi. Biroq ushbu transfer uchun haddan tashqari ko‘p mablag‘ sarflamaslik kerak. U «Chelsi»ga juda asqotgan bo‘lardi.

Markus oldinga intilishda davom etishi va o‘z kuchiga bo‘lgan ishonchni saqlab qolishi lozim. U «Barselona»da o‘zini yangitdan kashf eta oldi va unda yangi darajaga ko‘tarilish imkoniyati mavjud. «Chelsi» bu borada ish boshlashi kerak, ammo hamma narsa kelishuv shartlariga bog‘liq bo‘ladi», — deya Koulning so‘zlarini keltirmoqda The Sun nashri.

Yakunlangan 2025/2026 yilgi mavsumda Reshford «Barselona» safida barcha turnirlar doirasida 48 ta o‘yinda maydonga tushib, 14 ta gol va 14 ta golli uzatmaga mualliflik qildi.