«Tottenxem» Argentina terma jamoasi himoyachisi Markos Senesi bilan shartnoma imzolaganini rasman ma’lum qildi.

29 yoshli futbolchi «Bornmut» bilan shartnomasi yakunlangach, 1 iyul kuni London klubi safiga qo‘shiladi. Transfer xalqaro ruxsatnoma olingandan keyin erkin agent sifatida amalga oshiriladi.

— «Tottenxem» futbolchisiga aylanish men uchun alohida tuyg‘u. Klub ilk muloqotlardanoq nega meni o‘z loyihasining bir qismi sifatida ko‘rayotganini namoyon qildi. Faoliyatimdagi ushbu yangi bosqichni boshlashni intiqlik bilan kutyapman. Maydonga har safar chiqqanimda, muxlislar jamoadan faxrlanishi uchun qo‘limdan kelgan barcha ishni qilaman, — dedi Senesi.

Klub sport direktori Yoxan Lange argentinalik futbolchining yetakchilik fazilatlari va to‘p bilan muomala qilish mahoratini alohida ta’kidladi. Bosh murabbiy Roberto De Dzerbi esa himoyachining tajribasi va universalligi jamoaga ham himoyada, ham hujumlarni boshlash jarayonida katta yordam berishini qayd etdi.

Senesi Argentinaning «San-Lorenso» klubi tarbiyalanuvchisi hisoblanadi. U Yevropada «Feyenoord» safida to‘p surgan, 2022 yildan buyon esa «Bornmut» sharafini himoya qilib kelayotgan edi. O‘tgan mavsumda himoyachi jamoaning yetakchilaridan biriga aylanib, klubning o‘z tarixida ilk bor yevrokuboklar yo‘llanmasini qo‘lga kiritishida muhim hissa qo‘shdi. Shuningdek, u Angliya Premyer-ligasida to‘pni egallab olish, to‘sib qolish va to‘pni himoyadan uzoqlashtirish ko‘rsatkichlari bo‘yicha eng yaxshi futbolchilar qatoriga kirdi.

Senesi Argentina terma jamoasi safida hozirga qadar uchta uchrashuvda maydonga tushgan.