«Тоттенхэм» Аргентина терма жамоаси ҳимоячиси Маркос Сенеси билан шартнома имзолаганини расман маълум қилди.

29 ёшли футболчи «Борнмут» билан шартномаси якунлангач, 1 июль куни Лондон клуби сафига қўшилади. Трансфер халқаро рухсатнома олингандан кейин эркин агент сифатида амалга оширилади.

— «Тоттенхэм» футболчисига айланиш мен учун алоҳида туйғу. Клуб илк мулоқотларданоқ нега мени ўз лойиҳасининг бир қисми сифатида кўраётганини намоён қилди. Фаолиятимдаги ушбу янги босқични бошлашни интиқлик билан кутяпман. Майдонга ҳар сафар чиққанимда, мухлислар жамоадан фахрланиши учун қўлимдан келган барча ишни қиламан, — деди Сенеси.

Клуб спорт директори Йохан Ланге аргентиналик футболчининг етакчилик фазилатлари ва тўп билан муомала қилиш маҳоратини алоҳида таъкидлади. Бош мураббий Роберто Де Дзерби эса ҳимоячининг тажрибаси ва универсаллиги жамоага ҳам ҳимояда, ҳам ҳужумларни бошлаш жараёнида катта ёрдам беришини қайд этди.

Сенеси Аргентинанинг «Сан-Лоренсо» клуби тарбияланувчиси ҳисобланади. У Европада «Фейеноорд» сафида тўп сурган, 2022 йилдан буён эса «Борнмут» шарафини ҳимоя қилиб келаётган эди. Ўтган мавсумда ҳимоячи жамоанинг етакчиларидан бирига айланиб, клубнинг ўз тарихида илк бор еврокубоклар йўлланмасини қўлга киритишида муҳим ҳисса қўшди. Шунингдек, у Англия Премьер-лигасида тўпни эгаллаб олиш, тўсиб қолиш ва тўпни ҳимоядан узоқлаштириш кўрсаткичлари бўйича энг яхши футболчилар қаторига кирди.

Сенеси Аргентина терма жамоаси сафида ҳозирга қадар учта учрашувда майдонга тушган.