Gaiti terma jamoasi jahon chempionatidagi ilk uchrashuvi oldidan, ya’ni Shotlandiyaga qarshi bahsga bir necha kun qolganida o‘z o‘yin formasi dizaynini o‘zgartirishga majbur bo‘ldi. Bu haqda BBC xabar berdi.

Ma’lum qilinishicha, terma jamoa futbolkasida harbiy sahna tasvirlangan bo‘lib, bu FIFA qoidalariga zid deb topilgan.


Musobaqa oldidan o‘tkazilgan ikki o‘rtoqlik uchrashuvida foydalanilgan formada 1803 yildagi Vertyer jangi tasviri aks ettirilgan edi. Aynan ushbu jang Gaitining mustaqillikka erishishida hal qiluvchi ahamiyat kasb etgan. Shuningdek, formada mamlakat bayrog‘i ham joy olgan.

Biroq xalqaro federasiya reglamentiga ko‘ra, sport ekipirovkasida har qanday «siyosiy, diniy yoki shaxsiy mazmundagi xabarlar va shiorlar»ni joylashtirish taqiqlanadi.

FIFA mazkur vizual elementlar tashkilotning ekipirovka bo‘yicha qoidalari doirasida turlicha talqin qilinishi mumkin, degan xulosaga kelib, forma dizayniga o‘zgartish kiritishni talab qildi.

Gaiti va Shotlandiya terma jamoalari o‘rtasidagi uchrashuv 14 iyun kuni bo‘lib o‘tadi. Bellashuv 06:00 da start oladi.