Гаити терма жамоаси жаҳон чемпионатидаги илк учрашуви олдидан, яъни Шотландияга қарши баҳсга бир неча кун қолганида ўз ўйин формаси дизайнини ўзгартиришга мажбур бўлди. Бу ҳақда BBC хабар берди.

Маълум қилинишича, терма жамоа футболкасида ҳарбий саҳна тасвирланган бўлиб, бу ФИФА қоидаларига зид деб топилган.


Мусобақа олдидан ўтказилган икки ўртоқлик учрашувида фойдаланилган формада 1803 йилдаги Вертьер жанги тасвири акс эттирилган эди. Айнан ушбу жанг Гаитининг мустақилликка эришишида ҳал қилувчи аҳамият касб этган. Шунингдек, формада мамлакат байроғи ҳам жой олган.

Бироқ халқаро федерация регламентига кўра, спорт экипировкасида ҳар қандай «сиёсий, диний ёки шахсий мазмундаги хабарлар ва шиорлар»ни жойлаштириш тақиқланади.

ФИФА мазкур визуал элементлар ташкилотнинг экипировка бўйича қоидалари доирасида турлича талқин қилиниши мумкин, деган хулосага келиб, форма дизайнига ўзгартиш киритишни талаб қилди.

Гаити ва Шотландия терма жамоалари ўртасидаги учрашув 14 июнь куни бўлиб ўтади. Беллашув 06:00 да старт олади.